Hier is oor die jare allerhande fassinerende uitrustings ontwerp en gemaak: droomtrourokke vir die mooiste bruide, wasige sagte rokke vir romantiese aande, uitsette vir eksotiese reise in ver lande, matriekafskeidrokke wat die verbeelding aangryp en treffende skeppings vir ’n verskeidenheid geleenthede.

Ons gaan in hierdie ruimte na van die mooiste hiervan kyk. Dit bly ’n interessante storie hoe die vrou, die idee en die materiaal, uiteindelik eindig in ’n uitrusting waarin sy tevrede voel en wat die geleentheid komplimenteer. ’n Skeppende pad wat so bevredigend is.

Sabeth Mashinini is die bedrewe stikster wat die legkaart van pante uitpluis en aanmekaar stik. Sy is al byna ontwerper in eie reg. Sy werk meer as 25 jaar hier en is ’n onlosmaakbare deel van die Studio. Onder haar vlytige vingers het vele lieflike skeppings vorm aangeneem!

Deesdae is die Studio ’n verkleurmannetjie wat gestalte gee aan uitrustings en stories en prentjies. Dit huisves ’n boekery, ’n ryk skatkis vol ougoed maar ook die nuutste bydraes. Ons poësie en letterkunde en musiek is grensloos… ons werk en skep terwyl die harp, barok of Mozart sorg vir inspirasie.